صينية جلاش بالكبد والقوانص تقدم الوصفة الشيف سارة
طبعا متعودين علي الجلاش يكون محشي لحمه مفرومه لكن عندنا كل جديد وعندنا طريقة سهلة وبسيطة جدا والطعم تحفه وهي الجلاش بالكبد والقوانص
طريقة عمل صينية جلاش بالكبد والقوانص
مكونات جلاش بالكبد والقوانص
- لفة جلاش
- سمنه سايحه أو زبدة سايحه
- حبة زيت
- بصلة متوسطة مفرومة
- ثوم مفروم
- طماطم متقطعه قطع صغيرة
- فلفل ألوان متقطع قطع صغيرة
- كبد ( الكمية اللي نحبها )
- قوانص ( الكمية اللي نحبها )
- فلفل اسود
- ملح
- كمون
- بابريكا
- كزبرة ناشفة
- زعتر
- نص كوب لبن أو كوب لبن
- بيضة
طريقة التحضير جلاش بالكبد والقوانص
- طبعا نغسل الكبد والقوانص كويس بالخل ونصفيهم كويس
- وبعدين نجيب طاسة علي نار متوسطه ونحط فيها الزيت واما يسخن ننزل بالبصل يتشوح حبه
- وبعدين ننزل بالثوم المفروم يتشوح حبه مع البصل
- وبعدين ننزل بالقوانص الاول لأنها بتاخد وقت في التسوية شويه
- وبعد ما نسوي القوانص حبه ننزل بالطماطم والفلفل نشوحهم معاها
- وبعدين ننزل عليهم بالكبد ونشوح كله مع بعض ونقلب كويس
- وفي الاخر ننزل بالبهارات بتاعتنا ( الفلفل الاسود + الملح + الكمون + كزبرة ناشفة + زعتر + بابريكا )
- ونقلب كله مع بعضه كويس
- كده الحشو جاهز عندنا
- نجيب صينية وندهنها سمنه سايحه ونقسم لفة الجلاش نصين بالتساوي
- نجيب اول نص ونرص في الصينية وندهن سمنه سايحه بين كل طبقة أو بين كل طبقتين لحد ما نخلص النص الاولاني
- وبعدين نحط الحشو بتاعنا ( الكبد والقوانص )
- وبعدين نكمل النص التاني زي النص الاول كده ( ندهن بين كل طبقة سمنه سايحه أو بين كل طبقتين ) لحد ما النص التاني يخلص
- وبعدين نقطع الجلاش براحه
- وبعدين نجيب كوباية ونحط فيها اللبن والبيضه وحبة فلفل اسود وملح صغيرين ونقلب كويس جدا
- وبعدين نصبهم علي وش الجلاش ونوزعهم كويس ونمسك الصينيه نهزها ونلفها بحيث نوزع اللبن فيها كلها
- وبعدين ندخلها الفرن على درجه حراره 180 لمدة ثلث ساعة أو علي حسب سخونة الفرن لحد اما الوش يحمر
وتقدم مع بطاطس مقلية أو شيبسي وسلطة كول سلو
وبألف هنا وشفا علي قلوبكم أرجو ترك تعليق بملاحظاتكم
كل الوصفات وطرق تحضير الطعام موجوده علي التطبيق الخاص بنا
“فضلا منك وليس أمرا إذا أعجبك الوصفة يرجى منكم التكرم بوضع إعجاب وتعليق ومشاركة الوصفة لأصدقائك“
